Centro de Produción de Audiovisuais (CPA) » Novas de Lugo
03/07/2012
O Presidente da Fundación TIC, José Ramón Gómez Besteiro, fixo entrega este luns do CD “Con ton e son”
foto 2222O Presidente da Deputación e da Fundación TIC, José Ramón Gómez Besteiro, fixo entrega este luns do CD “Con ton e son” ós compoñentes do grupo de Salcedo Aires da Poxa, da Pobra do Brollón, que recolle media ducia de temas de música tradicional galega, mesturada con composicións propias. O disco pertence a “Son Lugueses”, a colección de proxectos musicais editados e financiados na súa totalidade pola TIC co fin de impulsar ós artistas da provincia. Gómez Besteiro entregou á formación musical 1.000 copias do traballo audiovisual gravado nos estudos da produtora Miño Media, emprazados no municipio do Corgo.
Aires da Poxa naceu nos anos 80 froito das inquedanzas musicais dalgúns membros doutro grupo da parroquia pobrense de Salcedo, Limiar, como alternativa para seguir polo camiño da foliada e a alborada na comarca de Lemos. Tras a súa disolución, a mediados dos 90, a formación rexurdiu no mes de maio de 2010, para continuar o camiño emprendido no pasado. Neste último ano, a agrupación musical actuou en decenas de alboradas e festas en toda Galicia, incluído o Entroido da súa parroquia, no que nas dúas últimas edicións amenizou á espera da saída do afamado Oso de Salcedo. Aires da Poxa está composto por Xeila Castro e Álvaro Moscoso, nas gaitas; María Fernández, na pandeireta; Martín González, na caixa e voz; Alberte González, na voz e percursión; e Iván Pérez, no acordeón.
A TIC cos músicos de Lugo
A Fundación TIC presta a súa colaboración ós músicos da provincia co fin de difundir o seu traballo dentro e fóra de Lugo. Proba delo é a colección “Son Lugueses”, na que se inclúen, entre outros, os traballos discográficos das Bandas de Música de Vilalba e Sarria, o himno oficial do Arde Lvcvs da Cohors III Lucensium e o do grupo monfortino La Cuarta Pared. Ademais, profesionais e bolseiros da TIC realizaron nos últimos anos varios vídeos musicais como “Torres de Compostela”, da eurovisiva Lucía Pérez; “La búsqueda” e "New conclusions", dos grupos ribadenses “Escala Dinker” e “Sun Face”; así como o do grupo do Incio “Arandela”, de música tradicional. Tamén ven ofrecendo apoio en varios festivais de música como o “Festival Solidario de Baganda”, celebrado no 2010 en Castro de Rei; o “Resurrection Fest 2011”, o “Hardcore Assault” e a Canción do Landro, en Viveiro. Este último foi gravado por alumnos e bolseiros da TIC para a súa emisión en “V Televisión” e na segunda canle da TVG.
Volver
