Centro de Produción de Audiovisuais (CPA) » Novas da Fundación TIC
13/06/2017
A TIC e o SERGAS promoverán hábitos saudables entre a poboación da provincia de Lugo a través de audiovisuais
- Alumnos e bolseiros, baixo a supervisión de profesionais, elaborarán os traballos audiovisuais que tamén recollerán os actos de conmemoración do Día Internacional de Enfermería
- Santos dixo que “con este acordo queremos contribuír á difusión do importante labor social dos profesionais sanitarios na promoción de condutas e hábitos saudables entre os lucenses”
A Fundación TIC da Deputación de Lugo e a Xerencia Integrada de Lugo, Cervo e Monforte do SERGAS promoverán hábitos saudables entre os habitantes da provincia a través de produtos audiovisuais elaborados por alumnos e bolseiros da TIC baixo a supervisión de profesionais. O patrón da TIC e Deputado de Relacións Institucionais, Álvaro Santos, e o xerente da Xerencia Integrada, Ramón Ares Rico, asinaron este luns un convenio de colaboración que tamén inclúe a realización de traballos informativos sobre o funcionamento dos servizos dos centros sanitarios así coma dos actos de conmemoración do Día Internacional de Enfermería.
Labor social dos profesionais sanitarios
Santos dixo que “con este acordo queremos difundir o importante labor social dos profesionais sanitarios na promoción de condutas e hábitos saudables entre os lucenses, fundamentais para previr enfermidades e ter unha boa calidade de vida”. Ademais, o patrón da TIC afirmou que “esta é unha oportunidade máis para que os alumnos e titulados en prácticas da nosa Escola de Imaxe e Son leven á práctica os seus coñecementos en realización e produción nun escenario real”.
A TIC cos lucenses
Con este acordo supéranse os 170 convenios de colaboración que a TIC ten asinados con organizacións sen ánimo de lucro da nosa provincia. A entidade presidida por Darío Campos desenvolve parte do seu labor social a través da colaboración con asociacións que traballan a prol dos veciños e veciñas da provincia.
Volver
